Monday, April 26, 2010

ಹಾವಿನ ನಾಲಗೆ



ಅಪ್ರಾಮಾಣಿಕರನ್ನು ಸಾಮಾನ್ಯವಾಗಿ "ಹಾವಿನಂತೆ ಎರಡು ನಾಲಗೆಯವನು" ಎಂದು ಹೇಳುವುದು ಸಾಮಾನ್ಯ. ಪಾಪ, ಹಾವಿಗಂತೂ ಅದೆಷ್ಟು ಆಪಾದನೆಗಳಿವೆಯೋ ಏನೊ, ಎರಡು ನಾಲಗೆ ಇದ್ದ ಮಾತ್ರಕ್ಕೆ ಹಾವು ಅಪ್ರಾಮಾಣಿಕವಾಗಬೇಕೆ? ಇರಲಿ, ಈ ಗಾದೆಯ ಗೂಢಾರ್ಥ ಏನಿದೆಯೋ ಅದು ಈಗ ಬೇಡ. ಹಾವಿಗೆ ಎರಡು ನಾಲಗೆ ಇರುವುದು ಅಪ್ರಾಮಾಣಿಕವಾಗಿ ನಡೆದುಕೊಳ್ಳಲಂತೂ ಅಲ್ಲವೆಂಬುದು ಹೇಗೆ ಎಂದು ನೋಡೋಣ.

ಹಾವುಗಳು ಕ್ಷಣಕ್ಷಣಕ್ಕೂ ನಾಲಗೆಯನ್ನು ಹೊರಹಾಕುತ್ತಿರುವುದನ್ನು ನಾವೆಲ್ಲ ಕಂಡಿದ್ದೇವಷ್ಟೆ? ಅನೇಕರು ಇದನ್ನು ಉಸಿರಾಡುವ ಸಲುವಾಗಿ ಎಂದು ತಪ್ಪಾಗಿ ಗ್ರಹಿಸಿರುತ್ತಾರೆ. ಉಸಿರಾಡುವುದಕ್ಕಲ್ಲ ಹಾಗೆ ನಾಲಗೆಯನ್ನು (ಗಳನ್ನು) ಹೊರಚಾಚುವುದು. ಸಾಮಾನ್ಯವಾದ ಭಾಷೆಯಲ್ಲಿ ಹೇಳಬೇಕೆಂದರೆ ವಾಸನೆ ನೋಡಲು! ಮೂಗಿನಿಂದ ಮೂಸುವುದೇ ಬೇರೆ, ಹಾವು ಸುತ್ತಮುತ್ತಲಿನ ಪರಿಸರದ ಆಘ್ರಾಣಿಸುವುದೇ ಬೇರೆ. ಗಾಳಿಯಲ್ಲಿ ಬೇರೆ ಪ್ರಾಣಿಗಳ ದೆಸೆಯಿಂದ - ಮುಖ್ಯವಾಗಿ ತನ್ನ ಆಹಾರ ಪ್ರಾಣಿಗಳು ಮತ್ತು ಶತ್ರು ಪ್ರಾಣಿಗಳು - ಉಂಟಾದ ರಾಸಾಯನಿಕ ಬೆರಕೆಗಳನ್ನು ತನ್ನ ನಾಲಗೆಯ (ಗಳ) ದ್ರವದಲ್ಲಿ ಬೆರೆಸಿಕೊಂಡು ತಿಳಿದುಕೊಳ್ಳುತ್ತೆ. ನಾಲಗೆಯು ಕವಲೊಡೆದಿರುವುದರ ಉದ್ದೇಶ, ಎರಡು ನಾಲಗೆಯ ಮಧ್ಯೆ ವಿಶೇಷವಾದ ಅಂಗವೊಂದಿದೆ. ಅದರ ಹೆಸರು "ಜೇಕಬ್‍ಸನ್ ಅಂಗ" ಎಂದು. ಮೇಲೆ ಹೇಳಿದ ಆಘ್ರಾಣವನ್ನು ಮಾಡುವುದು ವಾಸ್ತವದಲ್ಲಿ ಈ ಜೇಕಬ್‍ಸನ್ ಅಂಗ.



ಗಂಡು ಹಾವುಗಳು ಆಘ್ರಾಣವಲ್ಲದೆ ಹೆಣ್ಣು ಹಾವುಗಳನ್ನು ಒಲಿಸಿಕೊಳ್ಳಲು ಸಹ ನಾಲಗೆಯನ್ನು ಆಡಿಸುತ್ತವೆಯೆಂಬುದು ವಿಶೇಷ ಸಂಗತಿ.

-ಅ
25.12.2009
2PM

5 comments:

  1. ಹೌದು ನಾನೂ ಎಂದೊ ಓದಿದ್ದು ನೆನಪು, ಹಾವು ವಾಸನೆ ನೋಡಲು ನಾಲಿಗೆ ಹೊರ ಚಾಚುತ್ತೆ ಅನ್ತ. ಹಾವಿಗೆ ಕಿವಿ ಕೇಳೊಲ್ಲವಂತೆ ಅಲ್ಲವೇ? ಆದರೂ ಪುಂಗಿಗೆ ತಲೆ ಆಡಿಸುವುದು ಯಾಕೆ ಎಂಬುದು ನನಗೆ ಗೊತ್ತಿಲ್ಲ. ಗೊತ್ತಿದ್ದರೆ ತಿಳಿಸಿ. ಹೆಣ್ಣು ಹಾವನ್ನು ಒಲಿಸಿಕೊಳ್ಳಲು ನಾಲಿಗೆ ಚಾಚುತ್ತದೆ ಎಂಬುದು ತಿಳಿದಿರಲಿಲ್ಲ. ಒಳ್ಳೆಯ ಮಾಹಿತಿ.

    ReplyDelete
  2. ಮನುಷ್ಯ ತನ್ನ ಎಲ್ಲ ತಪ್ಪಿಗೂ ಒಂದೊಂದು ಪ್ರಾಣಿಯನ್ನು ಉದಾಹರಿಸಿಬಿಡುತ್ತಾನೆ. ಆದರೆ ವಾಸ್ತವದಲ್ಲಿ ಆ ಪ್ರಾಣಿಯ ಗುಣಕ್ಕೆ ಬೇರೆಯೆ ಕಾರಣವಿರುತ್ತದೆ. ಹಾವಿನ ನಾಲಿಗೆ ಅದರ ವಾಸನಾಗ್ರಾಹಿ ಅಂಗ . ವೈರಿ ಅಥವಾ ಆಹಾರ ಅಥವಾ ಸಂಗಾತಿ ಇರುವ ದಿಕ್ಕು, ದೂರವನ್ನು ತನ್ನ ನಾಲಿಗೆ ಚಾಚುವುದರ ಮೂಲಕ ಗ್ರಹಿಸುತ್ತದೆ.

    ReplyDelete
  3. ಈ ಮಾಹಿತಿಯಿಂದ ವಿಸ್ಮಯವಾಯಿತು.

    ReplyDelete
  4. ಒಳ್ಳೆಯ ಮಾಹಿತಿ!
    ಧನ್ಯವಾದಗಳು!

    ReplyDelete

ಒಂದಷ್ಟು ಚಿತ್ರಗಳು..