Tuesday, April 15, 2008

ಅಪ್ಪನ ಕಥೆ - ಭಾಗ ೨

ಸಂದರ್ಶಕನೊಬ್ಬನನ್ನು ಆಸ್ಟ್ರೇಲಿಯಾಕ್ಕೆ ಕಳಿಸಿದ್ದೇನೆ. ಅವನು ಯಾರನ್ನು ಹೇಗೆ ಸಂದರ್ಶನ ಮಾಡಿದ್ದಾನೆಂಬುದನ್ನು ತಿಳಿದುಕೊಳ್ಳಲು ನನಗೆ ಕುತೂಹಲ.

"ಬನ್ನಿ ಸಮುದ್ರದ ಆಳಕ್ಕಿಳಿಯೋಣ. ಈ ಆಳದಲ್ಲಿ ಸಮುದ್ರ ಬಹಳ ಬಣ್ಣಬಣ್ಣವಾಗಿ ಕಾಣುತ್ತೆ. ನಮ್ಮ ಅತಿಥಿ ಹೆಚ್ಚು ದೂರವಿಲ್ಲ. ಅರ್ಧದಷ್ಟಿಳಿದರೆ ಸಾಕು. ಅದೋ. ಅಲ್ಲೇ ಇದ್ದಾರೆ ನೋಡಿ.."

ಸಂದರ್ಶಕ: ನಮಸ್ಕಾರ, ನೀರ್ಕುದುರೆಗೆ...

ನೀರ್ಕುದುರೆ: ಓಹ್, ನಮಸ್ಕಾರ ಬನ್ನಿ ಬನ್ನಿ....




ಸಂ: ಕ್ಷಮಿಸಿ, ನೀವು 'ಈ' ಹಂತದಲ್ಲಿದ್ದೀರ ಅಂತ ಗೊತ್ತಿರ್ಲಿಲ್ಲ. ಆದರೂ ಸಂದರ್ಶನಕ್ಕೆ ನಮಗೆ ಅಪಾಯಿಂಟ್‍ಮೆಂಟ್ ಕೊಟ್ಟಿದ್ದಕ್ಕೆ ತುಂಬಾ ಥ್ಯಾಂಕ್ಸ್.

ನೀಕು: 'ಈ' ಹಂತ ಅಂತ ಯಾಕ್ ಹೇಳ್ತೀರಾ? ನಾನೀಗ ತುಂಬು ಬಸುರ.

ಸಂ: 'ಬಸುರ'??

ನೀಕು: ನೀವು ಹೆಂಗಸರಿಗೆ 'ಬಸುರಿ' ಅಂತೀರಲ್ಲಾ... ನಮ್ಮಲ್ಲಿ ಹೆಂಗಸರು ಗರ್ಭಧಾರಣೆ ಮಾಡೋದಿಲ್ಲ, ಅದಕ್ಕೆ 'ಬಸುರ' ಎಂದು ತಮಾಷೆ ಮಾಡಿದೆ. ಇನ್ನೂ ಎರಡು ದಿನ ಬಾಕಿ ಇದೆ. ನಾನು ಹಡೆಯೋದಕ್ಕೆ.

ಸಂದರ್ಶಕನಿಗೆ ಖುಷಿಯಾಗಿ, ತುಂಬು ಬಸುರ ನೀರ್ಕುದುರೆಯ ಹೊಟ್ಟೆಯನ್ನೊಮ್ಮೆ ಸವರಿ, "Wowwww.... ಎಷ್ಟು ಮಕ್ಕಳ 'ತಂದೆ-ತಾಯಿ' ಆಗ್ತೀರ ಅಂತ ನಿಮ್ಮನಿಸಿಕೆ?"

ನೀಕು: ಹೋದ ಸಲ, ಎರಡು ಸಾವಿರ!! ಈ ಸಲ ಅಷ್ಟು ಇದೆಯೋ ಇಲ್ಲವೋ ಗೊತ್ತಿಲ್ಲ!

ಸಂ: ಎರಡು ಸಾವಿರ!! ಅಬ್ಬಾಹ್!! ಅದ್ ಸರಿ, ನಿಮ್ಮ ಪತ್ನಿಯೆಲ್ಲೋ ಕಾಣಿಸ್ತಿಲ್ವಲ್ಲಾ...

ನೀಕು: ಅವಳು ಬೆಳಿಗ್ಗೆ ಬಂದಿದ್ಲು. ಈಗ ಸುತ್ತಾಡಿಕೊಂಡು ಬರೋಕೆ ಹೋಗಿದ್ದಾಳೆ. ಬೇರೆ ಪ್ರಾಣಿಗಳ ಥರ ನಮ್ಮ ಮೇಲೆ ಡೌಟು ಪಡ್ಬೇಡಿಪ್ಪಾ.. ಮನುಷ್ಯನಿಗಿಂತಲೂ ನಾವು ಪವಿತ್ರರು. ಏಕ ಪತಿ-ಪತ್ನಿ ವ್ರತಸ್ಥರು ನಾವು!!




ಸಂ: ಹೌದಾ?? ಆಶ್ಚರ್ಯ!! ನಿಮ್ಮ ಬಾಳು ಚೆನ್ನಾಗಿರ್ಲಿ. ನಿಮ್ಮ ಬಗ್ಗೆ ವಯಕ್ತಿಕ ಪ್ರಶ್ನೆಗಳನ್ನು ಕೇಳ್ಬೋದಾ?

ನೀಕು: ಏನ್ ಬೇಕಾದ್ರೂ ಕೇಳಿಪ್ಪಾ.. ಗೌಪ್ಯ ಸಂಗತಿಗಳು ಇರೋದು ಮನುಷ್ಯರಲ್ಲಿ ಮಾತ್ರ. ನಾವು ಮುಕ್ತ ಮನಸ್ಸಿನೋರು..

ಸಂ: ನಿಮ್ಮ ದಾಂಪತ್ಯ ಜೀವನದ ಬಗ್ಗೆ ಹೇಳಿ..

ನೀಕು: ನಾನು 'ದೊಡ್ಡೋನ್' ಆದ ಕೆಲವೇ ದಿನಗಳಲ್ಲಿ ನನಗೆ ಅವಳು ಸಿಕ್ಕಳು. ಇದು ನಮ್ಮ ಎರಡನೇ ಸಂಭೋಗದ ಫಲ. 'ಚೀಲ' ತುಂಬಿಸಲು ನಾನೂ ಅವಳೂ ತುಂಬಾ ಹಾತೊರೆಯುತ್ತಾ ಒಬ್ಬರನ್ನೊಬ್ಬರು ಸೇರಿದೆವು. ನಾನು ಗರ್ಭಧಾರಣೆ ಮಾಡಿದೆ. ಅವಳು ಹೊರಗೆ ಹೋಗುತ್ತಾಳೆ. ಪ್ರತಿದಿನ ಬೆಳಿಗ್ಗೆ ಬಂದು ನನ್ನನ್ನೂ ಚೀಲದೊಳಗಿನ ತನ್ನ ಮಕ್ಕಳನ್ನೂ ನೋಡಿ ಹೋಗುತ್ತಾಳೆ. ನಮ್ಮದು ಶಾಶ್ವತ ಪ್ರೀತಿ. ಇದರ ಬಗ್ಗೆ ನನಗೆ ಹೆಮ್ಮೆ!!

ಸಂ: ಬಹಳ ಸಂತೋಷ ನೀಕು.. ನಿಮ್ಮ ಮಕ್ಕಳು?

ನೀಕು: ಚೀಲದಲ್ಲಿ ಈಗ ಸುಮಾರು ಎರಡು ಸಾವಿರ ಮೊಟ್ಟೆಗಳಿವೆ. ಎಲ್ಲವೂ ಹೊರಬರುವವರೆಗೂ ನಾನು ಭದ್ರವಾಗಿ ನೋಡಿಕೊಳ್ತೀನಿ. ಅಕ್ಕ ಪಕ್ಕ ಓಡಾಡೋ ಹಾಗಿಲ್ಲ ಒಂದು ತಿಂಗಳು. ಒಂದು ಹನಿ ನೀರೂ ಕುಡೀದೇ ಉಪವಾಸ ಮಾಡ್ಬೇಕು. ನನ್ನ ಚೀಲದಲ್ಲಿ ಉಪ್ಪು ನೀರು ತುಂಬಿಕೊಂಡಿದ್ದೀನಿ. ಮಕ್ಕಳು ಹೊರಗೆ ಬಂದ ತಕ್ಷಣ ಅವು ತಮ್ಮ ಕಾಲು ಮೇಲೆ ತಾವು ನಿಂತ್ಕೋಬೇಕು ನೋಡಿ, ಅದಕ್ಕೆ ಸಮುದ್ರವನ್ನು ನನ್ನ ಈ ಉದರಚೀಲದಲ್ಲೇ ಸೃಷ್ಟಿ ಮಾಡಿರ್ತೀನಿ.

ಸಂ: ಈಗ ಹೆತ್ತ ಮೇಲೆ, ಮತ್ತೆ ಎಷ್ಟು ದಿನ ಆದ್ಮೇಲೆ....?????

ನೀಕು: ನಿಮ್ಗೆ ತುಂಬಾ ಸಂಕೋಚ ಅನ್ಸುತ್ತೆ ಮಾತಾಡೋಕೆ. ಇರಲಿ. ಈಗ ಹೆತ್ತ ಮೇಲೆ, ನಮ್ಮ ಮುಂದಿನ ಸಂಭೋಗಕ್ಕೆ ಹೆಚ್ಚೇನು ದಿನ ಇರಲ್ಲ. ಒಂದು ವಾರದ ಒಳಗೆ ಅವಳ ಮಿಲನಕ್ಕೆ ನಾನು ಕಾಯುತ್ತಿರುತ್ತೇನೆ. ಮತ್ತೆ ಇನ್ನೆರಡು ಸಾವಿರ ಮಕ್ಕಳ ತಂದೆ ಆಗುತ್ತೇನೆ ನಾನು..

ಸಂ: ಬರೀ ತಂದೆ ಅಲ್ಲ, ತಾಯಿಯೂ ಆಗುತ್ತೀರ ನೀವು.

ನೀಕು: ಏನೇ ಆಗಲಿ, ಅವಳ ಜೊತೆಯ ಮಿಲನದಿಂದಲ್ಲವೇ ನಾನು ಗರ್ಭ ಧರಿಸುವುದು? ಅವಳ ಮೊಟ್ಟೆಗಳಿಂದಲ್ಲವೇ ಈ ಮರಿಗಳು? ಹಾಗಾಗಿ ಅವಳೇ ತಾಯಿ, ನಾನೇ ತಂದೆ.





...................................................................................................................................................................

ನೀರ್ಕುದುರೆಗಳ (Hippocampus ingens) ವೈಶಿಷ್ಟ್ಯವೇನೆಂದರೆ ಗಂಡು ಗರ್ಭ ಧರಿಸುತ್ತೆ, ಹೆಣ್ಣು ತನ್ನ ಗರ್ಭಪಾಶವನ್ನು ಗಂಡಿನ ಚೀಲದೊಳಕ್ಕೆ ಸೇರಿಸಿ ತನ್ನೊಳಗೆ ರಚಿಸಿರುವ ಮೊಟ್ಟೆಗಳನ್ನು ಸೇರಿಸುತ್ತೆ. ಸಂಭೋಗ ಕ್ರಿಯೆಯಲ್ಲಿ ಸೊಗಸಾದ ನೃತ್ಯವನ್ನು ಗಂಡೂ ಹೆಣ್ಣೂ ಆಡುತ್ತವೆ. ಒಂದು ತಿಂಗಳ ಗರ್ಭದ ನಂತರ ಸಾವಿರಕ್ಕೂ ಹೆಚ್ಚು ಚಿಕ್ಕ ಚಿಕ್ಕ ಮರಿಗಳು ಚೀಲದೊಳಗಿನಿಂದ ಹೊರಬರುತ್ತವೆ. ನೂರಿನ್ನೂರು ಕೂಡ ತನ್ನ ಜೀವವನ್ನುಳಿಸಿಕೊಳ್ಳಲು ಪರದಾಡುತ್ತವೆ. ದೊಡ್ಡ ದೊಡ್ಡ ಮೀನುಗಳಿಗೆ ಆಹಾರವಾಗಿ ಹೋಗುತ್ತವೆ. ಇನ್ನೊಂದು ವಿಶೇಷವೆಂದರೆ ನೀರ್ಕುದುರೆಗಳು ಏಕ ಪತಿ-ಪತ್ನಿ ವ್ರತಸ್ತ ಪ್ರಾಣಿಗಳು!! ಯಾವ ಪ್ರಾಣಿಯಲ್ಲೂ ಕಾಣಸಿಗದ ಈ ವಿಶೇಷ ಗುಣ ನೀರ್ಕುದುರೆಯಲ್ಲಿದೆ.

ಮಕ್ಕಳನ್ನು ಹಡೆಯುವ ತಂದೆ - ತಾಯಿ ನೀರ್ಕುದುರೆಯ ವಿಡಿಯೋ ಇಲ್ಲಿದೆ...




ಈ ಸುಂದರವಾದ ಸೊಗಸಾದ ವಿಶೇಷವಾದ ನೀರ್ಕುದುರೆಯನ್ನು ಅನೇಕರು ತಿಂದು ಖಾಲಿ ಮಾಡುತ್ತಿದ್ದಾರೆ - ಬಹಳ ರುಚಿಯಿರುತ್ತೆ ಅಂತ. ಇದನ್ನು ಅಕ್ವೇರಿಯಮ್‍ನಲ್ಲಿ ಸಾಕುವ ಶೋಕಿ ಇನ್ನು ಕೆಲವರಿಗಾದರೆ, ಚೈನಾದವರಿಗೆ ಇದರಿಂದ ಔಷಧಿ ಮಾಡುವ ಅಭ್ಯಾಸ. ಹೀಗಾಗಿ ನೀರ್ಕುದುರೆಗಳು ತಿಂಗಳಿಗೆ ಒಂದು ಲಕ್ಷ ಹುಟ್ಟಿದರೆ ತೊಂಭತ್ತೊಂಭತ್ತು ಸಾವಿರವು ಮನುಷ್ಯನಿಂದ ಹತವಾಗುತ್ತಿವೆ.

ಮುಂದಿನ ಭಾಗದಲ್ಲಿ ಬೇರೊಂದು ಪ್ರಾಣಿಯ 'ಅಪ್ಪನ ಕಥೆ'ಯನ್ನು ನೋಡೋಣ..

-ಅ
15.04.2008
3PM

7 comments:

  1. wow ... sumaaru hosa vishya gothaaytu :-) good one ... keep it flowing ...

    ReplyDelete
  2. waahhhhhh !!!!!!!!!!!!!!!! nijvaaglu prakrutiyondigina nimma maatukate namage tumbaa vishayagaLanna tiLisikoDtide gurugaLE....I am learning many things !!

    ReplyDelete
  3. ಇದೇನಪ್ಪ ಗರ್ಭ ಧಾರಣೆ ಅನ್ತಿದೀರ, ಅಪ್ಪ ಅನ್ತಿದೀರ ಅಂತ ಕನ್ಫ್ಯೂಸ್ ಆಯ್ತು.. ಆಮೇಲೆ ಪೂರ್ತಿ ಓದಿದ ಮೇಲೆ ಆಶ್ಚರ್ಯ ಆಯಿತು... ವಿಜ್ಞಾನ ನಿಜಕ್ಕೂ ವಿಸ್ಮಯ ಲೋಕ ಅಲ್ವ?

    ReplyDelete
  4. different and very informative....niroopaNaa shaili tumba hiDisthu... :-)

    ReplyDelete
  5. ವೈಜ್ಞಾನಿಕ ವಿಚಾರವನ್ನು ತುಂಬಾ ಚೆನ್ನಾಗಿ ಬರೆದಿದ್ದೀರ

    ReplyDelete
  6. first time appa place allirovru kooda gharbhadane madthare annnodhanna hodhi, thumbhane aasharya aaytu,,,,,, edhunna namge tilisikottidhakke dhanyawadhagalu tamage,,,,,,,,,thank you

    ReplyDelete

ಒಂದಷ್ಟು ಚಿತ್ರಗಳು..